Yan Sanda Sun Ceto Malawa Talatin Abuja

Rundunar yan sandan Najeriya ta samu gagarumar nasara wajen dakile ayyukan masu safarar mutane a yankin Abuja da wasu wuraren da ke makwabtaka da babban birnin tarayya.

Wannan nasara ta samu ne bayan jami’an tsaro sun gudanar da wani samame na musamman bisa ingantattun bayanan sirri da suka tattara.

A yayin aikin, jami’an sun yi nasarar ceto mutane 30 yan asalin kasar Mali, wadanda ake zargin an shigar da su Najeriya ta haramtacciyar hanya domin amfani da su wajen wasu ayyuka da suka saba wa doka.

Rahotanni sun bayyana cewa waɗanda aka ceto sun kasance cikin mawuyacin hali kafin jami’an tsaro su kai musu dauki.

Rundunar ta kuma bayyana cewa an kama wasu mutane da ake zargi da hannu a safarar mutanen, yayin da ake ci gaba da bincike domin gano sauran wadanda ke da alaƙa da wannan haramtacciyar sana’a.

Yan sanda sun jaddada aniyarsu ta ci gaba da yaƙi da safarar mutane da sauran laifuffukan da ke barazana ga tsaron kasa da rayuwar jama’a.

Haka kuma, rundunar ta bukaci al’umma da su ci gaba da bai wa jami’an tsaro hadin kai ta hanyar kai rahoton duk wani abu da suke zargi, domin taimakawa wajen hana aikata miyagun laifuka a cikin al’umma.