Iran ta harba makamai masu linzami zuwa sansanin sojin Amurka da Birtaniya
Rahotanni daga kafafen yada labarai na Amurka sun bayyana cewa kasar Iran ta harba makamai masu linzami guda biyu masu cin matsakaicin zango zuwa sansanin sojin hadin gwiwar Amurka da Birtaniya da ke tsibirin Diego Garcia a tekun Indiya.
Jaridar The Wall Street Journal ta ruwaito daga wasu majiyoyi da dama cewa duk da harba makaman, babu wani daga cikinsu da ya sauka a cikin sansanin sojin.
Haka kuma kafar yada labarai ta CNN ta nakalto wani jami’in Amurka yana cewa an harba makaman ne da safiyar ranar Juma’a daga yankin Iran.
An bayyana cewa nisan da ke tsakanin Iran da tsibirin Diego Garcia ya kai kusan kilomita 3,800, wanda hakan ya sa ake kallon lamarin a matsayin wani babban yunkuri na nuna karfin soja.
A baya dai tsohon jagoran addinin Iran ya taba bayar da umarni cewa kada makamai masu linzamin kasar su wuce tazarar kilomita 2,000, lamarin da ke nuna cewa wannan sabon hari ya zarce wannan iyaka.
A kokarin samun karin bayani, BBC ta tuntubi ma’aikatar tsaron Amurka, wato Pentagon, da kuma ma’aikatar tsaron Birtaniya. Sai dai Pentagon ta ce a halin yanzu ba ta da wani bayani da za ta iya fitarwa dangane da lamarin.
Rahoton ya kara nuna yadda rikice-rikicen siyasa da na tsaro a yankin Gabas ta Tsakiya ke ci gaba da jan hankali a duniya.
