Jaruma Radiya Jibril Ta Sake Aure

Fitacciyar jarumar masana’antar Kannywood, Radiya Jibril, ta sake shiga gidan aure karo na uku. Jarumar ta bayyana farin cikinta da godiyarta ga Allah bayan daura auren nata, tana mai bayyana cewa aure wata kaddara ce daga Ubangiji, ta sanar da hakan ne ranar lahadi 31 ga watan mayu 2026.

A sakon da ta wallafa, Radiya Jibril ta bayyana cewa ta dade tana fatan samun zaman aure na gari. Ta ce duk wata jarabawa da ta fuskanta a rayuwar aurenta tana kallonta a matsayin kaddarar Allah.

Jarumar ta kuma yi addu’ar Allah Ya ba ta ikon kare mutuncinta da zaman lafiyarta a gidan auren da aka daura mata.

Ta roki Allah Ya sanya wannan aure ya kasance alheri gare ta, iyalanta, da makomarta. Radiya Jibril na daga cikin fitattun jaruman Kannywood da suka yi suna a fina-finan Hausa tsawon shekaru.

A baya, jarumar ta taba sanar da aurenta tare da bayyana cewa za ta rage ko ta daina harkar fim domin mayar da hankali kan rayuwar aurenta.

Sai dai bayan wasu watanni, an sake ganinta a wasu ayyukan talla da kuma harkokin fina-finai, lamarin da ya nuna cewa auren nata na baya ya kawo karshe.

Bayan rabuwarta da auren da ya gabata, Radiya ta dawo harkar fina-finai inda ta fito a wasu fitattun shirye-shirye da fina-finan Hausa.

Daga cikin ayyukan da ta sake bayyana a cikinsu akwai fim din Wani Dare da wasu tallace-tallacen kamfanoni daban-daban. Masoya Kannywood sun ci gaba da bibiyar rayuwarta da kuma ci gaban aikinta a masana’antar.

Masoya da abokan sana’ar jarumar sun taya ta murna tare da yi mata fatan samun zaman lafiya da kwanciyar hankali a sabon gidan aurenta. Wasu daga cikin mabiyanta sun yi addu’ar Allah Ya sanya wannan aure ya zama mafi alheri a rayuwarta.

Daura auren Radiya Jibril karo na uku ya sake jawo hankalin masoya Kannywood. Yayin da ake taya ta murna, da dama suna fatan Allah Ya ba ta zaman lafiya, hakuri, juriya, da albarkar zuri’a a sabon gidan aurenta.