Za’a Gudanar da Sallar Idi Karfe 8:00am zuwa 9:00am a Nigeria

Kungiyoyin addinin Musulunci na Jama’atu Izalatil Bid’ah Wa Iqamatis Sunnah (JIBWIS) da Jama’atu Nasril Islam (JNI) sun sanar da cewa za a gudanar da Sallar Idi na Eid-el-Fitr gobe a Najeriya daga karfe 8:00 na safe zuwa 9:00 na safe a wurare daban-daban na fadin kasar.

Sanarwar ta bukaci al’ummar Musulmi da su halarci wuraren Sallar Idi da wuri domin gudanar da ibadar cikin tsari da kwanciyar hankali. Kungiyoyin sun kuma roki masu ibada da su kiyaye dokoki da tsare-tsaren tsaro da hukumomi suka tsara domin tabbatar da zaman lafiya yayin bukukuwan Sallah.

JIBWIS da JNI sun kara da cewa Sallar Idi wata dama ce ga Musulmi su nuna godiya ga Allah bayan kammala azumin watan Ramadan, tare da karfafa zumunci da taimakon juna a tsakanin al’umma.

Haka kuma sun yi kira ga Musulmi da su yi addu’o’i domin zaman lafiya, hadin kai da ci gaban Najeriya, yayin da ake gudanar da bukukuwan Eid-el-Fitr a duk fadin kasar.

Kungiyoyin sun yi wa daukacin al’ummar Musulmi fatan Barka da Sallah tare da addu’ar Allah ya karbi ibadun Ramadan.