TINUBU Ya Nada Rabiu Abdullahi Sabon Shugaban NMDPRA
Shugaban Ƙasa Bola Ahmed Tinubu ya amince da sauke Saidu Mohammed daga mukaminsa na Shugaban Hukumar Nigerian Midstream and Downstream Petroleum Regulatory Authority bisa dalilai na inganta aiki da muradin ƙasa.
Haka kuma, Shugaban Ƙasa ya naɗa Rabiu Abdullahi Umar a matsayin sabon Shugaban Hukumar NMDPRA, wanda naɗin nasa zai fara aiki ne bayan Majalisar Dattawa ta tabbatar da shi.
Wannan mataki ya zo ne ƙarƙashin Dokar Petroleum Industry Act 2021, da nufin ƙarfafa tsarin kula da harkokin man fetur a ɓangaren midstream da downstream, tare da daidaitawa da manufar “Renewed Hope Agenda”.
Sabon shugaban da aka zaɓa, Rabiu Abdullahi Umar, ƙwararren masani ne da ya shafe fiye da shekara 25 yana aiki a fannonin makamashi, masana’antu da ababen more rayuwa, tare da gogewa a shugabanci da sauya tsarin aiki.
Ya yi karatun Accounting a Jami’ar Bayero Kano kuma ya kuma yi karatu a Harvard Business School.
Zuwa lokacin da Majalisar Dattawa za ta tantance sabon shugaba, babban jami’i mafi girma a hukumar zai riƙe ragamar aiki na wucin gadi.
Karanta Tinubu Ya Gargadi Sabbin Shugabannin APC Su Yi Aiki Da Adalci da Aminci
Shugaban Ƙasa ya kuma gode wa tsohon shugaban hukumar bisa gudunmawar da ya bayar, tare da masa fatan alheri a nan gaba.
Gwamnati ta bayyana cewa za ta ci gaba da tabbatar da sahihiyar shugabanci a muhimman hukumomin ƙasa domin ƙarfafa tattalin arziki da inganta tsarin makamashi a Najeriya.
