Saudiyya Ta Sanar da Ranar Juma’a a Matsayin Eid-el-Fitr Bayan Rashin Ganin Jinjirin Shawwal
Hukumomi a Saudi Arabia sun sanar da cewa ba a ga jinjirin watan Shawwal 1447AH ba a fadin kasar, wanda ke nuna cewa azumin watan Ramadan zai cika kwanaki 30 kafin a yi bikin Eid al-Fitr.
A cewar wata sanarwa da shafin labarai na Haramain ya wallafa a shafinsa na X (Twitter), an bayyana cewa ba a samu ganin jinjirin ba a ko’ina cikin kasar.
“Ba a ga jinjirin watan Shawwal 1447 a ko’ina cikin Masarautar Saudiyya ba a yau. Saboda haka watan Ramadan zai cika kwanaki 30, kuma za a yi bikin Eid Al-Fitr a ranar Juma’a,” in ji sanarwar.
Wannan na nufin cewa musulmi a Saudiyya za su kammala azumin watan Ramadan na bana kafin su fara bikin karamar Sallah a ranar Juma’a.
Tun a ranar 17 ga Maris, Muhammad Sa’ad Abubakar III ya bukaci al’ummar musulmi a Nigeria da su fara duban jinjirin watan Shawwal 1447AH a ranar Laraba domin tabbatar da ranar da za a yi Eid.
Musulmi a sassan duniya sun fara azumin Ramadan tun watan Fabrairu, inda suke kauracewa cin abinci, shan ruwa da kuma mu’amalar aure daga fitowar alfijir zuwa faduwar rana. Azumin Ramadan kan kasance ko dai kwanaki 29 ko 30 gwargwadon ganin jinjirin wata.
A halin yanzu, gwamnatin tarayya ta Najeriya ta riga ta ayyana ranakun Alhamis da Juma’a, 19 da 20 ga Maris, a matsayin ranakun hutu domin bikin Eid al-Fitr na shekarar 2026.
Sanarwar hutun ta fito ne daga Ministan Harkokin Cikin Gida, Olubunmi Tunji-Ojo, ta hannun sakatariyar dindindin ta ma’aikatar, Magdalene Ajani.
Ministan ya taya musulmi murnar kammala azumin Ramadan, inda ya bukace su da su ci gaba da rike darussan sadaukarwa, ladabi da tausayi da suka koya a lokacin azumi.
Har ila yau, ya bukaci ‘yan Najeriya da su yi amfani da lokacin bukukuwan Sallah wajen yi wa kasa addu’ar zaman lafiya, hadin kai da kwanciyar hankali.
Tunji-Ojo ya kuma gargadi jama’a da su yi bukukuwan cikin natsuwa tare da nuna tausayi ga marasa galihu a cikin al’umma, yana mai jaddada kudirin gwamnati na inganta zaman lafiya da hadin kan kasa. 🌙🕌
