Gwamnan Kano Ya Sauke Sagagi Daga Mukamin Kwamishina

Gwamnan Jihar Kano, Abba Kabir Yusuf, ya sauke Alhaji Shehu Wada Sagagi daga mukaminsa na Kwamishinan Ma’aikatar Zuba Jari, Kasuwanci da Masana’antu ta jihar.

Rahotanni sun bayyana cewa matakin ya zo ne a matsayin wani ɓangare na gyaran tsarin gudanarwa a cikin gwamnatin jihar domin ƙara inganta aiki da tabbatar da ingantaccen shugabanci a ma’aikatun gwamnati.

A wata sanarwa da mai magana da yawun gwamnan, Sunusi Bature Dawakin Tofa ya fitar, an bayyana cewa wannan mataki na cikin kokarin gwamnatin Kano na ƙarfafa ayyukan gwamnati da kuma tabbatar da cewa kowane sashe na gwamnati yana aiki yadda ya kamata domin amfanin al’ummar jihar.

Tun da farko dai Sagagi ya kasance ɗaya daga cikin kwamishinonin da gwamnan ya rantsar a shekarar 2025 domin taimakawa wajen tafiyar da harkokin gwamnati, musamman a bangaren kasuwanci da zuba jari.

A lokacin rantsar da kwamishinonin, gwamnan ya jaddada cewa an zaɓi mutanen ne bisa kwarewa da cancanta domin su taimaka wajen inganta shugabanci da kuma kawo ci gaba ga al’ummar Kano.

Masu sharhi kan harkokin siyasa na ganin cewa irin wannan sauyi a majalisar zartarwar jihar na iya kasancewa wani yunkuri na sake fasalin gwamnati domin kara inganta ayyuka da kuma tabbatar da cika alkawuran da aka dauka wa al’umma.

Har zuwa lokacin hada wannan rahoto, gwamnatin jihar ba ta bayyana wanda zai maye gurbin Sagagi a wannan mukami ba.