Shugaban Amurka Donald Trump ya bayyana cewa rikicin Iran da Isra’ila na dab da ƙarewa, yayin da Shugaban Sojin Pakistan, Field Marshal Asim Munir, ya isa Tehran domin ƙoƙarin sasanta rikicin tsakanin Amurka da Iran ta hanyar diflomasiyya.
Trump Ya Ce Rikicin Iran Na Kusa da Karewa Yayin Da Pakistan Ke Ci Gaba Da Matsakanci A Tehran Shugaban Amurka, Donald Trump, ya bayyana cewa rikicin da ya shafi Iran da Isra’ila na dab da ƙarewa, yayin da ake ci gaba da ƙoƙarin diflomasiyya domin rage tashin hankali a yankin Gabas ta Tsakiya.
Wannan furuci na Trump ya biyo bayan ƙarin ƙoƙarin ƙasashen duniya wajen ganin an kawo ƙarshen rikicin cikin lumana, musamman bayan isowar Shugaban Sojin Pakistan, Field Marshal Asim Munir, birnin Tehran.
Rahotanni daga rundunar sojin Pakistan sun tabbatar da cewa ziyarar ta Munir na da nufin gudanar da tattaunawa da manyan jami’an Iran domin neman hanyar da za a rage rikici tsakanin Amurka da Iran, tare da hana sake barkewar faɗa a yankin.
Majiyoyi sun bayyana cewa ana kuma duba yiwuwar komawa birnin Islamabad domin ci gaba da tattaunawa tsakanin wakilan Amurka da Iran, bayan taron da aka yi a karshen mako ya ƙare ba tare da cimma matsaya ba.
Wani jami’in Iran ya bayyana cewa Field Marshal Asim Munir ya taɓa taka muhimmiyar rawa a baya wajen shiga tsakani, kuma zuwansa na yanzu na daga cikin ƙoƙarin daidaita dangantaka da rage tashin hankali tsakanin ɓangarorin biyu.
Trump ya ƙara da cewa yana da kwarin gwiwar cewa ana kusa cimma yarjejeniya, yana mai cewa ɓangarorin biyu suna nuna niyyar kawo ƙarshen rikicin, inda ya bayyana halin da ake ciki a matsayin “kusa da ƙarewa.”
Masana harkokin siyasa sun bayyana cewa shigar Pakistan cikin wannan matsalar na iya ƙara taimakawa wajen dawo da zaman lafiya da tabbatar da tattaunawa tsakanin manyan ƙasashen duniya a lokacin da ake cikin yanayi mai sarkakiya.
