Jagororin manyan jam’iyyun adawa a Najeriya sun yi watsi da sabuwar dokar zabe ta 2026 da aka yi wa gyara, wadda Bola Ahmed Tinubu ya sanya wa hannu kwanan nan.
Sun bukaci majalisar dokokin Najeriya ta gaggauta fara sabon tsarin sake duba dokar, suna zargin jam’iyyar All Progressives Congress (APC) da kokarin amfani da gyaran domin yin magudi a zaben 2027.
Shugaban kasar ya rattaba hannu kan dokar ne bayan majalisar ta yi mata gyare-gyare, sai dai tun kafin hakan ake ta ce-ce-ku-ce da zanga-zanga daga bangaren jam’iyyun adawa da kuma kungiyoyin farar hula.
Masu adawar sun dage cewa ya kamata a rika tura sakamakon zabe kai tsaye ta na’ura, maimakon tanadin amfani da tsarin takarda da ’yan majalisa suka saka a cikin dokar.
A wata sanarwa bayan taron manema labarai da aka gudanar a Abuja ranar Alhamis, tsohon mataimakin shugaban kasa Atiku Abubakar ya ce shi da sauran shugabannin adawa ba su amince da sabuwar dokar ba, yana mai cewa an gaggauta amincewa da ita ba tare da la’akari da muradun jama’a ba.
Ya kuma nuna goyon baya ga shugaban jam’iyyar New Nigeria Peoples Party (NNPP), Ajuji Ahmed, wanda ya soki sashe na 60(3) da ke bai wa Independent National Electoral Commission (INEC) damar amfani da tsarin takarda maimakon nuna sakamakon zabe kai tsaye ta na’ura idan aka samu tangardar na’ura.
A cewar bangaren adawar, sabuwar dokar ta saba wa ka’idojin dimokuradiyya, kuma wani yunkuri ne na rage gaskiya da sahihancin zabe a kasar.
