Gwamnatin Iran ta sanar da nadin Ayatollah Alireza Arafi a matsayin jagoran addinin kasar na riko, yayin da ake jiran zaɓen sabon jagoran addinin da zai maye gurbin tsohon jagoran kasar.
Rahotanni daga kafafen yada labarai na cikin Iran sun bayyana cewa an dauki wannan mataki ne domin tabbatar da ci gaba da tafiyar da al’amuran addini da siyasa a kasar har sai an kammala tsarin zaben sabon jagora.
A cewar dokokin Iran, Majalisar Kwararrun Malamai (Assembly of Experts) mai mambobi 88 ce ke da ikon zabar sabon jagoran addinin kasar. Ana zaben mambobin wannan majalisa ne kai tsaye ta hanyar zaben jama’a duk bayan shekaru takwas.
Majalisar ita ce ke da alhakin zaben sabon jagora idan kujerar ta zama babu kowa a kai, ko saboda mutuwa ko murabus na wanda yake kan mukamin.
Sai dai masana siyasa na ganin cewa tsarin na iya daukar lokaci saboda halin da kasar ke ciki a yanzu, musamman sakamakon tashin hankalin tsaro da rikice-rikicen siyasa da ake fuskanta a yankin Gabas ta Tsakiya.
Wasu rahotanni daga manazarta sun ce nadin Arafi a matsayin jagora na riko na nufin tabbatar da cewa cibiyoyin gwamnati da na addini sun ci gaba da aiki yadda ya kamata yayin da ake shirin zaben sabon jagora.
Ana sa ran Majalisar Kwararrun Malamai za ta fara zama domin tattauna yiwuwar zaben sabon jagoran addinin Iran a cikin makonni masu zuwa, duk da cewa halin tsaro da siyasar yankin na iya tasiri kan saurin kammala wannan tsari.
Masu sharhi na ganin cewa wanda duk aka zaba a matsayin sabon jagoran addini zai taka muhimmiyar rawa wajen jagorantar Iran a wannan lokaci mai cike da ƙalubale a siyasar yankin Gabas ta Tsakiya.
