Iran Ta Kai Sabbin Hare-Hare a Isra’ila da Kasashen Gulf
Rahotanni daga yankin Gabas ta Tsakiya sun nuna cewa Iran ta kai sabbin hare-hare a wasu kasashe na yankin da suka hada da Israel, Iraq, Bahrain da kuma Oman, lamarin da ya haddasa gobara a wurare da dama tare da janyo tsaikon ayyukan man fetur.
Gobara ta tashi a tashoshin mai na Iraq
A kudancin Iraq, kusa da tashar jiragen ruwa ta Port of Basra, rahotanni sun ce wasu tankokin dakon mai guda biyu sun kama da wuta bayan harin da aka kai.
Lamarin ya tilasta dakatar da ayyukan wasu tashoshin man fetur na yankin yayin da jami’an tsaro da na kashe gobara ke ƙokarin shawo kan wutar. Rahotanni sun nuna cewa mafi yawan ma’aikatan jiragen an ceto su cikin gaggawa, sai dai mutum guda ya rasa ransa.
Harin ya haddasa gobara a Bahrain
A Bahrain, gobara mai karfi ta tashi bayan an kai hari kan tankunan ajiyar man fetur da ke kusa da Bahrain International Airport.
Hukumomin kasar sun ce hayakin da ke tashi daga wurin yana da yawa matuka, lamarin da ya sa aka gargadi mazauna yankin su rufe tagogin gidajensu don guje wa shakar hayaki mai hadari.
Gobara a tashar jiragen ruwa ta Oman
A Oman, jami’an kashe gobara sun ci gaba da ƙokarin shawo kan gobarar da ta tashi a tankunan ajiyar mai bayan wani hari da aka kai a Port of Salalah.
Gwamnatin kasar ta kuma bayar da umarnin fitar da jiragen ruwa daga tashar fitar da man fetur a matsayin matakin kariya domin kauce wa karin hadari.
Gargadin Iran ga bankunan Amurka da Isra’ila
Rahotanni sun nuna cewa Islamic Revolutionary Guard Corps ta Iran ta yi gargaɗin cewa za ta fara kai hari kan bankunan United States da na Israel da ke yankin Gabas ta Tsakiya. Wannan na zuwa ne bayan wani hari da aka kai kan wani banki a Iran.
Manyan bankuna sun rufe ofisoshinsu
Sakamakon tashin hankalin da ke karuwa, wasu manyan bankunan kasa da kasa sun rufe ofisoshinsu a yankin Gulf.
Daga cikin bankunan da suka dauki wannan mataki akwai HSBC a Qatar, da kuma Citigroup da Standard Chartered a Dubai, inda aka umarci ma’aikata su zauna a gidajensu.
Masana harkokin tsaro na gargadin cewa irin wadannan hare-hare na iya kara jefa yankin cikin matsin tattalin arziki, musamman saboda tasirin da zai iya yi wa kasuwar man fetur da harkokin kasuwanci na duniya.
